اسلم شو

اسلم شو



میری کتاب پاکی باسٹرڈ وچوں اک  نظم

آصف شاہکار

بسّ ایران دا بارڈر پار کیتا

تے ترکی وڑدیاں سار ای

میں تاش دا آخری پتہ


‘ پئی اک دین دی بھائیوالی

حیاتی دی  بھائیوالی  اے  ‘

کڈھ کے سٹّ دتا

اسلم میرے سْٹے  پتے ولّ بجلی وانگوں جھپٹیا

تے جھاڑ کے رکھ لیا

تے میرے ولّ اس انج ویکھیا

جویں 1965 دی جنگ دے بعد

بارڈر تے کھلوتے ہوئے

فوجا سنگھ تے عمردین

اک دوجے ولّ ویکھدے سن

اسلم کول اجیہے پتیاں دی پوری اک گنڈھڑی سی ۔

میں دل وچ ہسیا

چلو اک شغل لبھا  اے

اسلم شو

تے آپ میں اک ڈھال پھڑ لئی

(اک ماسک چاڑھ لیا

اپنے پیشے ٹی وی پروڈیوسر دی  پھٹی لا لئی

ٹی. وی.

اک افسری، اک چمک

لوکاں دی گم نامی توں چھٹکارا حاصل کرن دی

خواہش دی کمزوری نوں بلیک میل کرن دا گر

ارض اے- روم { ایران تے ترکی وچکار باڈر پوسٹ}  آیا تے

اسلم چائیں چائیں پہلا پتہ کڈھا

اگلے اسلم ولّ تکیا

دو گھڑیاں  اک نقلی تے فیشنی  مسکان وکھائی

اسلم نوں یقین جیہا آیا تے خوش ہویا

پر دوجے پل ای بھنوالی کھاندا ڈگا

اگلا پتہ ویکھن تے لگے ٹائم  دے پیسے پیا منگدا سی

اسلم آکھیا –ایہہ کوئی عیسائی لگدا اے

میں چپ رہا

انقراآیا تے

اسلم اک وار پھر تکڑے ہو کے

حملہ کیتا تے پتے نوں جھاڑ پونجھ کے اگے کیتا

مڑ اوہو پہلا ڈرامہ دہریجا

اسلم آکھیا

ایہہ کوئی یہودی لگدا اے

استمبول آیا

تے اسلم کول حالے کافی پتے باقی سن

میں آکھیا –شابا ! تکڑا ہو

ایہہ اصلی تھاں اے

پر اک گلّ چیتے رکھی

پئی تیرے کول پتے بہتے نے ویلا تھوڑا اے

ہمت ماریں

تے میں ٹی. وی. وچ سکھیا

لوکاں توں دور رہنا

اتے اتوں کھلو کے

باقی ساریاں نوں تھلے ویکھن دا

فن ورتیا تے سوکھا رہا

اسلم ایدھر اک پل اک پتہ کڈھے

تے اودھر –دوجے پل اگلا

بدھ سی ، ہندو سی، سکھ سی ۔

اسلم کول تھوڑے پتے رہِ گئے تے

میں آکھیا

اسلم انج کر ایہہ پتے لے کے کسے اچے ہوٹل وچ جا

تے کسے میز تے بیٹھے کسے امریکی کروڑپتی یہودی نوں

تاڑ کے کول جا بیٹھیں تے

ترکی مسلم بیررے نوں اپنی خالی جیب وکھا کے آکھیں

آ بھائی مینوں گھٹّ کے جپھی پا تے

اس یہودی دے منہ تے تھکّ دے

اسلم میری گلّ منی جاں کوئی نہ ؟

پر اسلم شام نوں واپس آیا تے

گواچا گواچا لگدا سی

میں آکھیا –اسلم ایہہ پتے ضایع نہ کر

تے میریاں کجھ بجھارتاں بجھ

اسرائیل وچ رہندے

اک کالے ، بھوکھے دیش چون آئے یہودی

اپنی جمن تھاں چھڈی

اتے مظلوم فلستینیاں دے لہو وچ ہتھ وی رنگے

پر اوہ راکافیلر نوں شلوم  تے کہہ سکدا

پر اوہدے ہتھ وچ ہتھ پا کے کیوں نہیں ٹر سکدا ؟

تے چکّ عمر و دا کوئی نذرا موچی

جدا وچ مزدوری کردیاں

کسے شیخ شیہزادی نال کیوں نہی ہنی مون منا سکدا ؟

کوئی صحرائی بدو

کسے شیخ دی محل پارٹی وچ جا کے

کیوں نہیں نچّ سکدا ؟

اسلم ایہہ پتے ضایع نہ کر

ایہہ واپس لاہور فیکٹری وچ گھلّ دے

اوہ ایہناں نوں پالش کر کے

کسے دوجے ترکی جاں دبئی جاندے بندے ہتھ ویچ دینگے

اسلم میری کجھ گلّ سنی، کجھ نہ

تے میں اک ترکی شوقیا کلاکار نوں دسدا آیا

پئی ہر بندہ ٹی. وی. سٹار بن سکدا اے ۔

صرف چانس تے اک قابل ڈائریکٹر چاہیدا اے

تے میری اکھ وچ کیمرہ اے ۔

اوس میرے ولّ مارلن برانڈو وانگو ایکشن کر کے تکیا

تے میں اگوں اکھ ماری

Hi, Stranger! Leave Your Comment...

Name (required)
Email (required)
Website
 
UA-19527671-1 http://www.sanjhapunjab.net